العمل مع الشركات العالمية: عملي مع سناب شات؟

كتير من المصممين بيسألوني كيف قدرت اشتغل مع #سناب_شات
اليوم بجاوب على أكثر سؤال يجيني وبحكيلكم القصة كاملة بشكل مختصر.

في البداية أحب اعرفكم إن الموضوع ما كان فيه أي سعي مني ولا كان في دماغي كل الموضوع كان توفيق من ربنا في الأول وفي الاخر ..
اللى حصل بالضبط إن في شهر يونيو 2018 وصلني ميل من مديرة قسم الإعلام والتواصل بسناب شات، عبارة عن عرض وظيفة معهم
في الأول اخدت نص ساعة بحاول أفهم ايه اللى بيحصل وأتاكد إن دا ميل رسمي فعلاً مش ميل وهمي!

وبعد ما اتاكدت رديت عليهم إني جاهز للعمل وفي إنتظار البريف وطبيعة العمل وانا كُلي حمااااس
بالفعل بعدها بكام ساعة ردو عليا بالبريف كامل وايه اللى محتاجينة بالضبط ورغم إن سناب شات تطبيق تواصل معروف إلى إنهم حبو يعرفوني علية بشكل مفصل احنا مين وبنعمل ايه وهدفنا ايه ورؤيتنا ايه الخ

كان وقتها عدد المستخدمين 180 مليون مستخدم نشط
طبعاً إللي عرفتة انهم وصلولي عن طريق موقع #Behance وشافو الجزء المهم بالنسبة ليهم في شغلي وهو التايبوجرافي أو المخطوطات اللي كنت بعملها بشكل فري هاند وبما إن دا جزء من ال #Identity_Design والاستايل بتاعهم وهو توفير مرشحات المنطقة الجغرافية أو فلاتر أو ملصقات زي ما تسميها.

وهي عبارة عن جمل وعبارات شائعة بيتم استخدامها بشكل يومي وكبير حسب كل منطقة تعبيراً عن شعور ما أو مناسبة أو إحتفالية وهكذا طبعاً كلنا عارفين إن المملكة هي من أكثر الدول العربية إستخداماً لسناب شات وهنا بعض العبارات اللى قمت بتصميمها لهم
شافو إني أنسب واحد يصمم لهم المشروع بتاعهم واللى الحمدلله تم اعتمادة وإطلاقة في نهاية 2018 وانتشر في أنحال العالم العربي بفضل الله وحقق نجاح باهر إلى وقتنا هذا بالاخص هنا بالمملكة

شوف ياعزيزي في البداية لازم تعرف إن اغلب المواقع والشركات العالمية من خمس سنين تقريباً بقت تركز على الفري لانسر أو المستقلين ودا في مختلف المجالات مش بس #تصميم ودا عشان يوفرو مصاريف الإقامة والسفر والرواتب الكبيرة والتأمين وغيرها من المصاريف
وبقو يعتمدو بنسبة كبيرة على الفري لانسر من خلال المواقع والمنصات المعروفة زي #upwork و #freelancers لذلك قبل ما تحلم انت تشتغل مع شركة كبيرة في غيرك ملايين بيحلمو بنفس الحلم ..!

طيب ايه اللى يميزك انت عنهم وايه اللى يخليهم يختاروك أنت ويوافقو عليك سوا عن طريق وظيفة بدوام كامل أو جزئي ولو مستني مني أقولك على حاجة معينة وبعدها هتشتغل يبقى انا بكدب عليك والموضوع مش بيجي بالطريقة دي خالص !!
لكن كل اللى اقدر أفيدك بيه بكل صدق وأمانه

كلمة السر هي #أعمالك وشغلك هو اللى هيتكلم عنك مش أي حاجة تانية تخيل سناب شات لما كلموني لا سألوني عن هويتي أو عمري أو حتى شهادتي وتعليمي ! كل اللى كان يبحثو عنه هو الشغل ودا المعيار الثابت والأساسي اللى بيقيمو ويختارو بيه كبرى الشركات.!
لذلك كل اللى مطلوب منك هو إنك تجتهد في إنك تطلع أفضل حاجة عندك وتكون محدث شغلك وأعمالك أول بأول وتكون مواكب التطورات ومتابع التريند الخاص بمجالك، التطوير والإجتهاد دول مفتاح أي نجاح صدقني..

اخيراً حاب أقول حاجة مهمة
جميل يكون عندك هدف وتحلم إنك تشتغل في شركة كبيرة بس الأجمل إنك تشتغل الحاجة اللى بتحبها وتطور نفسك فيها كل يوم وصدقني ربنا هيكرمك فوق مما تتخيل.